கும்பமேளாவில் பிரபலமான பேரழகி! பாலிவுட்டில் தொடரும் கொலை மிரட்டல்கள்! - ஹாட் சினி தகவல்கள்

இப்போதுதான் ஆண்டு தொடங்கியதுபோன்று இருந்தாலும் அதற்குள் ஒரு மாதம் முடிவடையப்போகிறது. கடந்த ஆண்டு இறுதியிலிருந்து ஹைப் கொடுக்கப்பட்ட புதுப்படங்கள் பல பொங்கலை முன்னிட்டு வெளியான நிலையில் அவற்றில் எந்த படம் வசூல்ரீதியாகவும், விமர்சனரீதியாகவும் வெற்றிபெறும் என்ற எதிர்பார்ப்பானது மிகவும் அதிகமாகவே இருந்தது. பெரிய பட்ஜெட்டில் எடுக்கப்பட்ட படங்கள் மாபெரும் வெற்றிபெறும் என எதிர்பார்க்கப்பட்ட நிலையில், சில, மிகப்பெரிய ஏமாற்றத்தை அளித்தன. அதே சமயம் 12 ஆண்டுகளாக தள்ளிப்போன ‘மத கஜ ராஜா’ திரைப்படம் ரசிகர்கள் மத்தியில் நல்ல வரவேற்பை பெற்றுவருகிறது. இப்படி வெளியான படங்களின் அப்டேட்ஸ் ஒருபுறமிருக்க, அடுத்து என்னென்ன படங்கள் தயாராகவிருக்கின்றன என்பது குறித்து பேச்சு தொடங்கிவிட்டது. இந்த வாரம் இந்திய சினிமாவில் என்னென்ன ஹாட்டாப்பிக்ஸ்? பார்க்கலாம்.

ஷாக் கொடுக்கும் திரிஷா!

20 ஆண்டுகளுக்கும் மேலாக தென்னிந்திய சினிமாவில் முன்னணி கதாநாயகியாக வலம்வரும் திரிஷா, கடந்த ஆண்டு அதிகம் சம்பளம் வாங்கும் நடிகைகளில் முதலிடத்தை பிடித்தார். ஒரு படத்துக்கு ரூ.12 கோடிவரை சம்பளமாக பெற்றுவரும் இவர், இந்த ஆண்டு முழுக்க கால்ஷீட் கொடுத்து பிஸியாக ஓடிக்கொண்டிருக்கிறார். இந்நிலையில் திரிஷா சினிமாவிலிருந்து விலக முடிவெடுத்திருப்பதாகவும், இனி நடிக்கப்போவதில்லை என்று கூறியதாகவும் செய்திகள் வெளியாகி வருகின்றன.

திரிஷா சினிமாவிலிருந்து விலகுவதாக வெளியாகும் செய்திகள்

ஆனால் இதுகுறித்து திரிஷா தரப்பிலிருந்து எந்தவிதமான அதிகாரப்பூர்வ தகவல்களும் வெளியாகவில்லை. ஏற்கனவே சினிமாவிலிருந்து விலகி முழுநேர அரசியலில் ஈடுபடப்போவதாக அறிவித்திருக்கும் விஜய்யின் கட்சியில் திரிஷா இணையவிருப்பதாக செய்திகள் வலம்வந்த நிலையில், திரிஷா சினிமாவை விட்டு விலகினாலும் ஆச்சர்யப்படுவதற்கில்லை என்கின்றனர் நெட்டிசன்கள்.

ரஜினி குறித்து ஜிவிஎம்!

12 ஆண்டுகளுக்கு பிறகு வெளியாகி திரையரங்குகளில் வெற்றிகரமாக ஓடிக்கொண்டிருக்கும் ‘மத கஜ ராஜா’ திரைப்படத்தைத் தொடர்ந்து ‘துருவ நட்சத்திரம்’ திரைப்படமும் ரிலீஸுக்கு தயாராகி வருவதாக சொல்லப்படுகிறது. கௌதம் வாசுதேவ் மேனன் இயக்கத்தில் உருவான இப்படத்தில் விக்ரம் ஸ்டைலிஷ் ஹீரோவாக நடித்திருக்கிறார். பல்வேறு நிதி நெருக்கடிகளால் இந்த படம் ரிலீஸாவதில் சிக்கல்கள் ஏற்பட்ட நிலையில், இந்த பிரச்சினையை தீர்ப்பதற்காகவே தொடர்ந்து கிடைத்த கதாபாத்திரங்களிலெல்லாம் நடித்துவந்தார் ஜிவிஎம். இந்நிலையில் தற்போது நிதி பிரச்சினை தீர்ந்துவிட்டதாகவும், விரைவில் ‘துருவ நட்சத்திரம்’ வெளியாகும் என்றும் தெரிவித்திருக்கிறார்.

தனது படத்தில் ரஜினி நடிக்காதது குறித்து மனம்திறந்த ஜிவிஎம்

மேலும் இந்த படத்தில் நடிக்க முதலில் ரஜினியைத்தான் அணுகியதாகவும், முதலில் ஓகே சொன்ன அவர், பின்பு வேண்டாம் என்று கூறிவிட்டதாகவும், யாரோ ரஜினியிடம் சென்று, அவர் க்ளைமாக்ஸ் எழுத மாட்டார், சொன்ன பேச்சை கேட்கமாட்டார் என்று தன்னைப்பற்றி சொன்னதாகவும் கூறியிருக்கிறார். மேலும் அப்படி சொன்னது யார் என்று தனக்கு தெரியும் எனவும் ஆனால் அவரைப்பற்றி வெளியில் சொல்ல விரும்பவில்லை எனவும் தெரிவித்திருக்கிறார்.

‘வின்னர் 2’ வரப்போகிறதா?

சுந்தர் சி படங்கள் என்றாலே காமெடி கலந்த திரில்லர் இருக்கும். அதேபோல் டபுள் டிஜிட் கோடிகளில்தான் கட்டாயம் வசூலும் இருக்கும். அதிலும் குறிப்பாக, சுந்தர் சி - வடிவேலு காம்பினேஷன் என்றால் சொல்லவே தேவையில்லை. 2003ஆம் ஆண்டு வடிவேலு, பிரசாந்த் ஆகியோரை வைத்து சுந்தர் சி இயக்கிய ‘வின்னர்’ படத்தின் காமெடி காட்சிகளை இன்றுவரை யாராலும் மறக்கமுடியாது. எத்தனைமுறை பார்த்தாலும் மீண்டும் மீண்டும் சிரிக்கத் தூண்டும். இன்றுவரை பல மீம்ஸ்களில் ‘கைப்புள்ள’ என்ற பெயர் இடம்பெற்று வருகிறது.

‘வின்னர் 2’ திரைப்படம் குறித்து பரவிவரும் செய்திகள் 

அந்த அளவிற்கு நகைச்சுவையால் மட்டுமே சூப்பர் டூப்பர் ஹிட்டடித்த ‘வின்னர்’ படத்தின் இரண்டாம் பாகம் உருவாகவிருப்பதாக பேச்சுகள் அடிபடுகின்றன. சுந்தர் சியுடன் வடிவேலு மற்றும் பிரசாந்த் இருவரும் இருக்கும் புகைப்படம் வெளியாகி சமூக ஊடகங்களில் வைரலானதை அடுத்து இப்படத்திற்கான டிஸ்கஷன் முடிந்ததாக சொல்லப்படுகிறது. ஏற்கனவே ‘வின்னர்’ படத்தின் இரண்டாம் பாகம் விரைவில் உருவாகும் என்று பிரசாந்த் ஒரு பேட்டியில் தெரிவித்திருந்தார். ஆனால், இதுவரை அதுகுறித்த அதிகாரப்பூர்வ அறிவிப்பு எதுவும் வெளியாகவில்லை.

இதுபோதும் எனக்கு!

பாலிவுட் முதல் கோலிவுட்வரை பல மொழிகளில் நடித்து அசத்திவரும் ராஷ்மிகா மந்தனா, ‘புஷ்பா 2’ வெற்றிக்குப்பிறகு மீண்டும் பாலிவுட் பக்கம் சென்றிருக்கிறார். விக்கி கௌஷால் - ராஷ்மிகா நடிப்பில் மிகப்பெரிய பட்ஜெட்டில் பிரம்மாண்டமாக உருவாகியிருக்கும் ‘சாவா’ என்ற சரித்திரப் படத்தின் டிரெய்லர் வெளியாகி பிரம்மிப்பை ஏற்படுத்தியிருக்கிறது. மராத்திய மன்னர் சத்ரபதி சிவாஜியின் மகனான சத்ரபதி சம்பாஜி மகாராஜாவின் வாழ்க்கை வரலாற்றை மையமாகக் கொண்டு எடுக்கப்பட்டிருக்கும் இப்படத்தில் அவருடைய மனைவி மகாராணி ஏசுபாய் கதாபாத்திரத்தில் நடித்திருக்கிறார் ராஷ்மிகா. லக்‌ஷ்மண் உத்தேகர் இயக்கியிருக்கும் இப்படத்திற்கு ஏ.ஆர். ரஹ்மான் இசையமைத்திருக்கிறார்.

  ‘சாவா’ திரைப்படத்தில் விக்கி கௌஷால் குறித்து ராஷ்மிகா

இப்படம் காதலர் தினத்தை முன்னிட்டு பிப்ரவரி 14ஆம் தேதி வெளியாகவுள்ள நிலையில், படத்தின் புரமோஷன் நிகழ்ச்சிகள் விமரிசையாக நடைபெற்று வருகின்றன. காலில் அடிபட்டு நடக்கமுடியாமல் வீல்சேரில் உட்கார்ந்திருந்தாலும் தொடர்ந்து புரமோஷன் நிகழ்ச்சிகளில் பங்கேற்று வருகிறார் ராஷ்மிகா. இப்படம் குறித்து அவர் கூறுகையில், இந்த ஒரு படத்தில் நடித்ததே தனக்கு போதும் எனவும், இதன்பிறகு தான் சந்தோஷமாக ஓய்வுபெற்றுவிடுவேன் எனவும் இயக்குநரிடம் சொன்னதாக கூறினார். மேலும் ‘சாவா’ திரைப்படம் தன் வாழ்நாள் முழுமைக்கும் விருப்பமான படமாக மாறிவிட்டது எனவும், ட்ரெய்லரை பார்க்கும்போது விக்கி கௌஷால் ஒரு கடவுள் போல காட்சியளிப்பதாகவும் கூறியிருக்கிறார்.

யார் இந்த மோனலிசா?

உத்தரப்பிரதேச மாநிலத்தின் பிரயாக்ராஜ் பகுதியில் 144 ஆண்டுகளுக்கு ஒருமுறை நடைபெறும் மகாகும்பமேளா மிகவும் பிரசித்தம். இந்த ஆண்டு அங்கு நடைபெற்றுவரும் கும்பமேளாவில் லட்சக்கணக்கானோர் பங்கேற்றாலும் ஒரு ஒரே நாளில் உலகளவில் பிரபலமாகிவிட்டார், அந்த விழாவில் பெற்றோர் மற்றும் குடும்பத்தினருடன் ஊசி, பாசி மாலை விற்கவந்த மோனலிசா போஷ்லே என்ற 16 வயது இளம்பெண். அவரின் வசீகரிக்கும் கண்கள் மற்றும் அழகிய சிரிப்பு பலரின் கவனத்தையும் ஈர்த்த நிலையில், ஒருவர் அப்பெண்ணுடன் புகைப்படம் மற்றும் வீடியோ எடுத்து சமூக ஊடகங்களில் பதிவிட, ஒரே நாளில் ‘ப்ரவுன் பியூட்டி’ என மிகவும் பிரபலமடைந்துவிட்டார்.

கும்பமேளாவில் பிரபலமான ப்ரவுன் பியூட்டி மோனலிசா

கும்பமேளாவிற்குச் சென்ற பலர் அந்த பெண்ணுடன் புகைப்படம் எடுப்பது, அவரை வீடியோ எடுப்பது என பின்தொடர, அவர்களுடைய வியாபாரம் பாதிக்கப்படுவதாக குடும்பத்தினர் வருத்தம் தெரிவித்தனர். மேலும் பலர் அப்பெண்ணை பேட்டி எடுப்பது மற்றும் அங்குவந்த ஆண்கள் சிலர் அப்பெண்ணிடம் தவறாக நடக்க முயற்சிப்பது போன்ற காரணங்களால் அப்பெண்ணை சொந்த ஊருக்கே அனுப்பிவிட்டனர் பெற்றோர். இந்நிலையில் ‘ராம் கி ஜென்மபூமி’ மற்றும் ‘தி டெய்ரி ஆஃப் வெஸ்ட் பெங்கால்’ போன்ற படங்களை இயக்கிய சனோஜ் மிஸ்ரா மோனலிசாவை பாலிவுட்டில் அறிமுகப்படுத்த முடிவு செய்திருப்பதாக சொல்லப்படுகிறது. இதுகுறித்த அறிவிப்பு விரைவில் வெளியாகலாம்.

தொடரும் கொலைமிரட்டல்கள்

சமீப காலமாக பாலிவுட் பிரபலங்களுக்கு தொடர்ந்து கொலைமிரட்டல்கள் விடுக்கப்பட்டு வருகின்றன. கடந்த சில ஆண்டுகளாக சல்மான் கானை கொல்ல முயற்சித்ததுடன், அவ்வப்போது மிரட்டல்களும் விடப்பட்டு வருகின்றன. கடந்த வாரம் வீடுபுகுந்த திருடனால் சையிஃப் அலிகானுக்கு கத்திக்குத்து விழுந்த நிலையில், பாலிவுட் பிரபலங்களின் பாதுகாப்பு குறித்து கேள்விகள் எழுந்துவருகின்றன.

சல்மான் கானை தொடர்ந்து பாலிவுட் பிரபலங்களுக்கு விடுக்கப்பட்ட கொலைமிரட்டல்

இதற்கிடையே பாலிவுட் நகைச்சுவை நடிகர் கபில் ஷர்மா, நகைச்சுவை நடிகரும் பாடகருமான சுகந்த மிஸ்ரா, நடிகர் ராஜ்பால் யாதவ் மற்றும் நடன இயக்குநர் ரெமா டிசோசா ஆகியோருக்கு இமெயில் மூலமாக கொலைமிரட்டல் விடுக்கப்பட்டிருப்பது பாலிவுட் பிரபலங்களிடையே அச்சத்தை ஏற்படுத்தியிருக்கிறது. மேலும் அந்த மெயிலுக்கு பதில் அளிக்காவிட்டால் கொலை செய்துவிடுவோம் என்றும் கூறப்பட்டுள்ளதால், பயந்துபோன நடிகர்கள் காவல்துறையில் புகாரளித்துவருகின்றனர். இதனையடுத்து இமெயில் வந்த கம்ப்யூட்டரின் IP அட்ரஸை வைத்து குற்றவாளியை தேடும் பணியில் இறங்கியிருக்கின்றனர் மும்பை போலீசார்.